پشاور(نیوز ڈیسک)خیبر پختونخوا کے صوبائی دارالحکومت پشاور میں افغان قونصل خانے کے اعلی عہدیدار کے گھر پر نامعلوم موٹر سائیکل سوار فائرنگ کرکے فرار ہو گئے۔ فائرنگ کے نتیجے میں کوئی نقصان نہیں ہوا۔سپرنٹنڈنٹ پولیس (ایس پی) کینٹ پولیس کاشف کا کہنا تھا کہ نامعلوم موٹرسائیکل سواروں نے پشاور ٹاؤن کے علاقے میں واقع افغان قونصل خانے کے فرسٹ سیکریٹری ہمایوں یوسف زئی کے گھر پر فائرنگ کی۔ایس پی کاشف کا کہنا تھا کہ کسی قسم کا جانی نقصان نہیں ہوا، ملزمان فائرنگ کے بعد فرار ہوگئے۔فائرنگ کے واقعے کا مقدمہ ٹاون پولیس اسٹیشن میں فرسٹ سیکریٹری افغان قونصلیٹ ہمایوں یوسفزئی کی مدعیت میں نامعلوم افراد کے خلاف درج کر دی گئی ہے۔ایس پی کینٹ کا کہنا تھا کہ فائرنگ شارٹ مشین گن (ایس ایم جی) سے کی گئی۔انہوں نے بتایا کہ جائے وقوع سے 29خول بھی ملے ہیں،ایس پی کاشف نے بتایا کہ واقع کی تحقیقات شروع کردی ہیں جبکہ ملزمان کی شناخت کے لیے علاقے میں لگے سی سی ٹی وی کیمروں سیمدد حاصل کرنے کی کوشش کی جائے گی۔خیال رہے کہ دو روز قبل افغانستان کے پاکستانی سرحد کے قریب شہر جلال آباد میں پاکستانی قونصل خانے کو نشانہ بنانے کی کوشش کی گئی تھی، قونصل خانے پر خودکش حملے میں 7 اہلکار اور 3 حملہ آور ہلاک ہوئے تھے.