لاہور( نیوز ڈیسک) وزیر اعلیٰ محمد شہباز شریف کی چین کے 66ویں یوم تاسیس کے موقع پرچین کے صدر ،وزیراعظم،چینی قیادت اور عوام کو مبارکباد۔اس موقع پر شہباز شریف نے کہا کہ چین محنت،امانت اوردیانت کے سنہری اصول اپنا کر جہد مسلسل کے ذریعے دنیا کی دوسری بڑی معاشی قوت بن چکا ہے۔ عظیم چینی لیڈرشپ کی قیادت میں چین اقوام عالم کے لئے رول ماڈل بن چکا ہے۔ پاکستان دنیا کا واحد ملک ہے جس نے عوامی جمہوریہ چین کو سب سے پہلے آزاد و خودمختار ملک کی حیثیت سے تسلیم کیا۔ انہوں نے کہا پاکستان اور چین عالمی امور، امن پسندی اور باہمی احترام کے حوالے سے یکساں موقف رکھتے ہیں۔ وزیر اعظم نواز شریف کے دور میں پاک چین دوستی کے نئے باب کا آغاز ہو چکا ہے۔ دونوں ممالک کے درمیان تعلقات سودمند معاشی روابط میں بدل چکے ہیں۔ ان کا کہنا تھا کہ چین کا تاریخی اقتصادی پیکیج پاکستانی عوام کیلئے شاندار تحفہ ہے جسے پاکستانی قوم کبھی فراموش نہیں کرے گی۔ چائنہ پاکستان اقتصادی کوریڈور کے منصوبے سے ترقی و خوشحالی کے نئے دور کا آغاز ہوگا۔