اسلام آباد(نیوزڈیسک) مبینہ انتخابی دھاندلی کی تحقیقات کے لئے تشکیل دیا گیا جوڈیشل کمیشن آئندہ کھلی عدالت میں سماعت کرے گا جب کہ کمیشن کا آئندہ اجلاس سپریم کورٹ کی کمرہ عدالت نمبر ایک میں ہوگا۔چیف جسٹس ناصر الملک کی سربراہی میں جوڈیشل کمیشن کا اجلاس ہوا جس میں فیصلہ کیا گیا کہ چونکہ آرڈیننس میں تمام سیاسی جماعتوں کو کمیشن کے روبرو پیش ہونے کا موقع دیا گیا ہے اس لئے عام انتخابات میں حصہ لینے والی تمام سیاسی جماعتوں کو کمیشن میں تجاویز دینے کے لئے مدعو کیا جائے گا اور سیاسی جماعتیں اپنی جانب سے کسی بھی شخص یا وکیل کو پیش ہونے کی اتھارٹی دے سکتی ہیں۔اجلاس میں مزید فیصلہ کیا گیا کہ چیف جسٹس کے سیکریٹری حامد علی جوڈیشل کمیشن کے بھی سیکریٹری کے فرائض سر انجام دیں گے جب کہ دھاندلی کے حوالے سے بیان شواہد کے ہمراہ 15 اپریل تک سیکریٹری کمیشن کو جمع کروائے جاسکتے ہیں۔