اسلام آباد( نیوز ڈیسک) پاکستان تحریک انصاف کی استدعامنظور کرتے ہوئے سپیکر قومی اسمبلی سردار ایاز صادق نے وزیردفاع کی تقریرکے سخت جملے اسمبلی کی کارروائی سے حذف کرنے کی ہدایت کردی۔
پارلیمنٹ کے مشترکہ اجلاس میں اظہار خیال کرتے ہوئے پی ٹی آئی کی شریں مزاری نے کہاکہ وزیردفاع سیکیورٹی معاملات اور یمن کی صورتحال پر کم بولے اوراْنہوں نے اپنی توجہ پی ٹی آئی لیڈرشپ پر مرکوز رکھی اور دل کی بھڑاس نکالی جس کی وجہ شاید دھاندلی کی تحقیقات کے لیے جوڈیشل کمیشن کا قیام تھا، وہ درخواست کرتی ہیں کہ وزیردفاع کے الفاظ حذف کیے جائیں جس پر سپیکر نے ہدایات جاری کردیں۔ شیریں مزاری نے کہاکہ ماضی میں بھی امریکی جنگ کا حصہ بننے کی مخالفت کی تھی لیکن پھرپورے ملک کو سی آئی اے اور بلیک واٹر کے حوالے کردیا، کوشش کی جائے کہ یمن مین جنگ بندی کرائی جائے ، ہمیں تاریخ سے سبق سیکھناچاہیے ، سعودی عرب کو خطرہ ہواتو پھر جاناچاہیے لیکن معاملے کاتعلق سعودی عرب کی سلامتی نہیں بلکہ یمن سے متعلق ہے۔اْنہوں نے کہاکہ ہمیں امن کی طرف چلناہے ،جنگ میں شامل ہوناامن کے حق میں نہیں ہوگا، کسی کا ساتھ نہیں دے سکتے۔