اسلام آباد(نیوز ڈیسک)سابق صدر پرویز مشرف نے عبدالرشید غازی قتل کیس میں جاری وارنٹ گرفتاری کے خلاف نظر ثانی کی درخواست دائر کر دی ہے۔
نجی ٹی وی کے مطابق سابق صدر جنرل ریٹائرڈ پرویز مشرف کی جانب سے ان کے وکیل نے وارنٹ گرفتاری پر نظر ثانی کی درخواست دائر کی۔ درخواست میں موقف اختیار کیا گیا ہے کہ سابق صدر کا طبی معائنہ کرنے والے میڈیکل بورڈ کی رپورٹ آ گئی ہے جس میں کہا گیا ہے کہ ان کی طبیعت ٹھیک نہیں ہے اور وہ عدالت میں پیش نہیں ہو سکتے لہذا ایڈیشنل سیشن جج کی جانب سے جاری ان کے وارنٹ گرفتاری واپس لئے جائیں۔
واضح رہے کہ گزشتہ روز سیشن جج اسلام آباد واجد علی نے غازی عبدالرشید قتل کیس میں سابق صدر پرویز مشرف کے وارنٹ گرفتاری جاری کرتے ہوئے انہیں 27 اپریل کو عدالت میں پیش ہونے کا حکم دیا تھا۔