اسلام آباد(نیوز ڈیسک)بھارتی سیکرٹری خارجہ جے شنکر کا کہنا ہے کہ پاکستان آئندہ سارک کا سربراہ ہو گا، بھارت سارک کو کامیاب بنانا چاہتا ہے، ممبئی حملے کیس کو منطقی انجام تک لے جایا جائے۔ اسلام آباد میں پاک بھارت سیکریٹری خارجہ ملاقات کے بعد میڈیا سے گفتگو کرتے ہوئے بھارتی سیکریٹری خارجہ جے شنکر کا کہنا تھا کہ مذاکرات مثبت ماحول میں ہوئے، پاکستان اور بھارت نے مل کرکام کرنے پراتفاق کیا ہے۔ ان کا کہنا تھا کہ ممبئی حملہ کیس اور سرحد پار خلاف ورزیوں سے متعلق موقف کا اعادہ کیا گیا ہے جبکہ پاک بھارت سرحد پرکشیدگی ختم کرنے پر بھی زوردیا گیا ہے۔ بھارتی سیکریٹری خارجہ آج شام وزیراعظم نواز شریف سے ملاقات کریں گے،جہاں وہ نواز شریف کو بھارتی وزیر اعظم نریندر مودی کا خصوصی پیغام پہنچائیں گے۔ ملاقات کے بعدپریس کانفرنس بھی کریں گے۔ دریں اثناءبھارتی سیکرٹری خارجہ جے شنکر کی دفتر خارجہ آمد کے موقع پر پاکستانی ہم منصب اعزاز چوہدری نے ان کا استقبال کیا۔ دونوں رہنماو¿ں کی ملاقات کے بعد وفود کی سطح پر پاک بھارت مذاکرات کے دو دور ہوئے۔ بھارتی سیکرٹری خارجہ مذاکرات کے پہلے دور کے بعد بھارتی ہائی کمیشن گئے۔ بھارتی سیکریٹری خارجہ نے وزیر اعظم کے معاون خصوصی طارق فاطمی اور مشیر خارجہ سرتاج عزیز سے بھی الگ الگ ملاقات کی۔