اسلام آباد (نیوز ڈیسک)ایران نے اپنی دفاعی اور عسکری حکمتِ عملی میں جارحانہ صلاحیتوں کو مزید مضبوط بنانے کا عندیہ دیا ہے۔

ایرانی پاسداران انقلاب کے سینیئر مشیر بریگیڈیئر جنرل رضا نقدی نے کہا ہے کہ نئے فوجی ڈاکٹرائن کے تحت پاسداران انقلاب کو ایسی صلاحیتیں حاصل کرنے کی ہدایت کی گئی ہے جن کے ذریعے ضرورت پڑنے پر مخالف کی سرزمین میں بھی کارروائی کی جا سکے۔ایرانی میڈیا سے گفتگو کرتے ہوئے رضا نقدی کا کہنا تھا کہ پاسداران انقلاب کی عسکری استعداد کو اس سطح تک بڑھانے کا فیصلہ کیا گیا ہے کہ مستقبل میں کسی ممکنہ جنگ کی صورت میں کارروائی صرف ایرانی حدود تک محدود نہ رہے بلکہ دشمن کے علاقے تک بھی پہنچنے کی صلاحیت موجود ہو۔انہوں نے کسی ملک کا نام لیے بغیر واضح کیا کہ ایران کی نئی دفاعی پالیسی میں یہ صلاحیت اہم حیثیت رکھتی ہے۔ ان کے مطابق پاسداران انقلاب کو ممکنہ صورتحال سے نمٹنے کے لیے مکمل تیاری برقرار رکھنے کی ہدایت کی گئی ہے۔

ایرانی جنرل نے یہ بھی دعویٰ کیا کہ امریکا کا دفاعی بجٹ ایران کے فوجی بجٹ سے تقریباً 100 گنا زیادہ ہے، تاہم ان کے بقول حالیہ تنازع کے دوران مخالف کی جانب سے کیے گئے تمام 14 حملے یا اہداف ناکام رہے۔رضا نقدی کے مطابق نئے فوجی ڈاکٹرائن کا بنیادی مقصد ایران کی عسکری پوزیشن کو اس انداز میں مضبوط کرنا ہے کہ ملک صرف دفاعی کارروائیوں تک محدود نہ رہے بلکہ ضرورت پڑنے پر جنگ کا دائرہ مخالف کے علاقے تک منتقل کرنے کی صلاحیت بھی رکھتا ہو۔