اسلام آ باد (نیوز ڈیسک)جرمنی میں ایک غیر معمولی ڈکیتی کا واقعہ سامنے آیا ہے جہاں ملزمان نے دیوار توڑ کر بینک میں داخل ہو کر بڑی رقم لوٹ لی۔غیر ملکی ذرائع ابلاغ کے مطابق یہ واقعہ جرمنی کے مغربی شہر گیلسن کرچن میں واقع اسپارکاس بینک کی ایک شاخ میں پیش آیا۔ پولیس کا کہنا ہے کہ چوروں نے کرسمس کی تعطیلات کا فائدہ اٹھاتے ہوئے بینک کی دیوار میں سوراخ کیا اور اندر داخل ہو گئے۔پولیس کے مطابق ملزمان تقریباً ایک کروڑ یورو نقد رقم اور دیگر قیمتی اشیاء سمیٹ کر فرار ہونے میں کامیاب ہو گئے۔
اس واردات کا انکشاف اس وقت ہوا جب بینک کا فائر الارم بج اٹھا، جبکہ اگلے روز بینک آنے والے صارفین کو بھی اس چوری کا علم ہوا، جس پر متعدد افراد بینک کے باہر جمع ہو گئے اور احتجاج کیا۔عینی شاہدین نے پولیس کو بتایا ہے کہ ہفتے کی رات انہوں نے چند افراد کو قریبی پارکنگ گیراج کی سیڑھیوں سے بڑے بڑے بیگ اٹھائے گزرتے دیکھا تھا۔پولیس حکام کا کہنا ہے کہ واقعے کی تحقیقات جاری ہیں اور ملزمان کو گرفتار کرنے کے لیے مختلف پہلوؤں سے قانونی کارروائی عمل میں لائی جا رہی ہے۔
