اسلام آباد (نیوز ڈیسک) پاکستان اور بھارت کے درمیان رواں سال مئی میں پیدا ہونے والے فضائی تنازعے کے بعد سے لاپتہ رہنے والی بھارتی رافیل پائلٹ شیوانگی سنگھ بالآخر منظرِ عام پر آگئی ہیں۔

شیوانگی سنگھ کو ریاست ہریانہ کے امبالہ ایئر بیس پر بھارتی صدر دروپدی مرمو کے ہمراہ دیکھا گیا، جہاں صدرِ بھارت نے فضائیہ کے اس اہم اڈے کا دورہ کیا۔

رپورٹس کے مطابق دروپدی مرمو نے اپنے دورے کے دوران رافیل طیارے میں پرواز کا تجربہ کیا۔ وہ بھارت کی تاریخ میں پہلی صدر ہیں جنہوں نے دو مختلف جنگی طیاروں میں پرواز کی — اس سے قبل وہ 2023 میں سخوئی ایس یو-30 میں بھی اڑان بھر چکی ہیں۔

بھارتی صدر کے آفیشل ایکس (سابق ٹوئٹر) اکاؤنٹ پر اس دورے کی تصاویر جاری کی گئیں، جن میں ایک تصویر میں دروپدی مرمو کے ساتھ شیوانگی سنگھ کو کھڑا دیکھا جا سکتا ہے۔

واضح رہے کہ مئی کے فضائی تصادم میں پاکستان نے بھارت کے تین رافیل سمیت سات جنگی طیارے مار گرائے تھے، جس کے بعد شیوانگی سنگھ اچانک منظر سے غائب ہوگئیں۔ ان کے بارے میں مختلف قیاس آرائیاں گردش کرنے لگیں — بعض حلقوں نے دعویٰ کیا کہ وہ طیارے کے ساتھ ہلاک ہو گئیں، جب کہ کچھ کا کہنا تھا کہ انہیں پاکستانی فورسز نے گرفتار کر لیا ہے۔

تاہم پاکستان کی جانب سے ان کی گرفتاری یا موجودگی کی کبھی کوئی تصدیق نہیں کی گئی، جبکہ بھارتی حکام نے بھی اس معاملے پر خاموشی اختیار کیے رکھی۔ سوشل میڈیا پر بارہا مطالبہ کیا جاتا رہا کہ شیوانگی سنگھ کی تازہ تصاویر یا ویڈیوز جاری کی جائیں، مگر بھارتی حکومت کی طرف سے کوئی ردِعمل سامنے نہیں آیا۔

اب ساڑھے پانچ ماہ بعد ان کی نئی تصویر منظرِ عام پر آنے سے کئی سوالات دوبارہ جنم لے رہے ہیں — آخر وہ اس تمام عرصے کہاں رہیں اور ان کے ساتھ کیا پیش آیا؟ اس حوالے سے بھارتی فضائیہ یا وزارتِ دفاع کی طرف سے ابھی تک کوئی باضابطہ وضاحت سامنے نہیں آئی۔