اسلام آباد (نیوز ڈیسک) اسرائیلی وزیر اعظم بنیامین نیتن یاہو نے غزہ کے شہریوں کو شدید وارننگ دیتے ہوئے کہا ہے کہ وہ فوری طور پر علاقہ خالی کر دیں، کیونکہ اسرائیلی فوج نے زمینی اور فضائی حملوں میں تیزی لا دی ہے۔سماجی رابطے کی ویب سائٹ ایکس پر جاری اپنے ویڈیو پیغام میں نیتن یاہو نے دعویٰ کیا کہ پچھلے دو روز میں 50 عمارتیں تباہ کی جا چکی ہیں، اور یہ کارروائیاں صرف آغاز ہیں۔

ان کا کہنا تھا کہ غزہ شہر میں زمینی آپریشن کو مزید بڑھایا جائے گا اور مقامی آبادی کو پہلے ہی انتباہ جاری کر دیا گیا ہے کہ وہ علاقہ چھوڑ دیں۔اسرائیلی فوج کی جانب سے غزہ پر شدید بمباری جاری ہے، جسے انہوں نے “زبردست طوفان” کا نام دیا ہے۔ حماس کو بھی تنبیہ کی گئی ہے کہ اگر اس نے تمام یرغمالیوں کو رہا نہ کیا اور ہتھیار نہ ڈالے تو غزہ مکمل تباہی کا شکار ہو سکتا ہے۔دوسری جانب اسرائیلی دفاعی وزیر اسرائیل کاتز نے اپنے بیان میں کہا کہ آج غزہ کے اوپر بمباری کا شدید طوفان برسے گا اور دہشت گرد ٹاورز زمین بوس کر دیے جائیں گے۔

انہوں نے مزید کہا کہ یہ حماس کے جنگجوؤں کے لیے آخری پیغام ہے: یرغمالیوں کو آزاد کریں ورنہ غزہ کو صفحہ ہستی سے مٹا دیا جائے گا۔خیال رہے کہ دو دن قبل اسرائیلی فوج نے غزہ کے ایک 12 منزلہ رہائشی بلاک کو تباہ کر دیا تھا جہاں بے گھر خاندان قیام پذیر تھے۔ اس سے تین گھنٹے قبل فوج نے اس عمارت اور اطراف میں خیموں میں موجود ہزاروں افراد کو علاقہ خالی کرنے کی ہدایت دی تھی۔فوج کا دعویٰ ہے کہ یہ عمارت حماس کے عسکری منصوبہ سازوں اور جاسوسی کے مرکز کے طور پر استعمال ہو رہی تھی، اور وہیں سے حملوں کی تیاری کی جا رہی تھی۔

עדכון חשוב >> pic.twitter.com/P7DhwMaSaG

— Benjamin Netanyahu – בנימין נתניהו (@netanyahu) September 8, 2025