ریاض (این این آئی)پاکستان اور سعودی عرب کے درمیان قیدیوں کے تبادلے سے متعلق ہونے والے معاہدے پر عمل درآمد شروع کردیا گیا ہے۔سعودیہ میں پاکستانی سفیر احمد فاروق کے مطابق سعودی عرب سے اب تک 30 پاکستانی قیدیوں کو پاکستان منتقل کیا جاچکا ہے، قانونی کارروائی اور طریقہ کار مکمل ہونے کے بعد قیدیوں کے تین گروپوں کو پاکستان منتقل کیا گیا ہے۔

پاکستانی سفیر نے بتایا کہ کہ قیدی اپنی باقی سزا پاکستان کی جیلوں میں مکمل کریں گے جبکہ 419 پاکستانی قیدیوں کی وطن واپسی کے لیے قانونی کارروائی جَلد مکمل کی جائے گی۔پاکستانی سفیر نے کہا کہ سعودی جیلوں میں 70 فیصد پاکستانی منشیات کے کیسز میں سزا یافتہ ہیں، یہ ایک سنگین معاملہ ہے۔یاد رہے کہ دونوں ملکوں نے سزا یافتہ قیدیوں کے تبادلے سے متعلق معاہدے پر دستخط کیے تھے۔