بیجنگ (نیوز ڈیسک) چین نے امریکی صدر ڈونلڈ ٹرمپ کے اس بیان پر شدید ردعمل دیا ہے، جس میں انہوں نے امریکی شہریوں کو فوری طور پر ایران کے دارالحکومت تہران سے نکلنے کی ہدایت کی تھی۔ چین نے امریکہ پر زور دیا ہے کہ وہ حالات کو مزید خراب کرنے کے بجائے خطے میں تناؤ کم کرنے کے لیے سنجیدہ اقدامات کرے۔
چینی وزارت خارجہ کے ترجمان گو جیاکن نے بیجنگ میں میڈیا سے گفتگو کرتے ہوئے کہا کہ:
“دھمکی آمیز بیانات، دباؤ میں اضافہ اور اشتعال انگیز اقدامات حالات کو بہتر نہیں بنائیں گے، بلکہ ان سے مشرق وسطیٰ میں کشیدگی مزید بڑھنے کا خدشہ ہے۔”
انہوں نے اس بات پر زور دیا کہ موجودہ حالات کے پیش نظر ضروری ہے کہ تمام عالمی طاقتیں ذمہ داری کا مظاہرہ کریں اور ایران و اسرائیل کے درمیان بڑھتی ہوئی کشیدگی کو کم کرنے کے لیے تعمیری کردار ادا کریں۔
چین کا یہ بیان ایسے وقت میں سامنے آیا ہے جب مشرق وسطیٰ میں ممکنہ جنگ کے خدشات بڑھتے جا رہے ہیں اور دنیا بھر میں اس صورتحال پر تشویش پائی جاتی ہے۔ چین نے کہا ہے کہ تنازعات کے حل کے لیے سفارتی ذرائع ہی واحد مؤثر راستہ ہیں۔
