اسلام آباد (نیوز ڈیسک) ایران کے سپریم لیڈر آیت اللّٰہ علی خامنہ ای نے جنگی اختیارات سے متعلق ایک اہم فیصلہ کرتے ہوئے ان تمام اختیارات کو پاسداران انقلاب کی اعلیٰ شوریٰ کے سپرد کر دیا ہے۔

ایرانی ذرائع ابلاغ کے مطابق، موجودہ کشیدہ صورتحال کے پیشِ نظر آیت اللّٰہ خامنہ ای نے جنگ سے متعلق تمام اہم فیصلوں کا اختیار ایرانی فوج کے بااختیار ادارے، پاسداران انقلاب کی شوریٰ کو منتقل کر دیا ہے۔ اس فیصلے کے تحت اب جنگی حکمت عملی، جوابی کارروائیاں اور فوجی اقدامات کا مکمل اختیار مذکورہ ادارے کے پاس ہوگا۔

دوسری جانب سابق امریکی صدر ڈونلڈ ٹرمپ نے حالیہ بیان میں دعویٰ کیا ہے کہ انہیں معلوم ہے کہ ایرانی سپریم لیڈر کہاں موجود ہیں۔ ان کا کہنا تھا کہ خامنہ ای ایک آسان ہدف ہیں، تاہم اس وقت امریکہ انہیں نشانہ بنانے کا ارادہ نہیں رکھتا۔

ٹرمپ نے مزید کہا کہ اگر ایران نے غیر مشروط طور پر ہتھیار نہ ڈالے تو نتائج بھگتنا ہوں گے۔ ان بیانات کے بعد خطے میں تناؤ مزید بڑھنے کا خدشہ ظاہر کیا جا رہا ہے۔