اسلام آباد (نیوز ڈیسک) سابق امریکی صدر ڈونلڈ ٹرمپ نے ایران سے غیر مشروط ہتھیار ڈالنے کا مطالبہ کرتے ہوئے دعویٰ کیا ہے کہ انہیں ایرانی سپریم لیڈر کی موجودہ خفیہ پناہ گاہ کا پتہ ہے۔
ٹرمپ نے اپنے سوشل میڈیا پلیٹ فارم “ٹروتھ سوشل” پر جاری ایک بیان میں کہا کہ امریکی افواج کو ایران کی فضائی حدود پر مکمل کنٹرول حاصل ہے اور اب ایران کی دفاعی صلاحیتیں امریکی طاقت کے سامنے کوئی حیثیت نہیں رکھتیں۔
انہوں نے مزید کہا کہ ایران کے پاس جدید فضائی نگرانی کے نظام اور دیگر عسکری ساز و سامان موجود ہیں، لیکن ان کی کارکردگی امریکی ہتھیاروں کے سامنے کچھ بھی نہیں۔ ان کے بقول، دنیا میں امریکا جیسا دفاعی سازوسامان کوئی اور ملک نہیں بنا سکتا۔
اپنے اگلے پیغام میں ٹرمپ نے دعویٰ کیا کہ ایرانی سپریم لیڈر ایک مخصوص مقام پر چھپے ہوئے ہیں اور وہ نشانہ بنانے کے لیے ایک آسان ہدف ہیں، تاہم انہوں نے واضح کیا کہ فی الوقت امریکا کا ایسا کوئی ارادہ نہیں کہ انہیں نشانہ بنایا جائے۔
ٹرمپ کا کہنا تھا کہ “ہم ان پر حملہ کرنے نہیں جا رہے، کم از کم فی الحال نہیں، لیکن ہمیں یہ بھی برداشت نہیں کہ ہمارے شہری یا فوجی ایرانی میزائلوں کا نشانہ بنیں۔ ہمارا صبر اب ختم ہونے کو ہے۔”
انہوں نے آخر میں ایک بار پھر زور دیا کہ ایران کو غیر مشروط طور پر ہتھیار ڈال دینے چاہئیں۔
