تہران (نمائندہ خصوصی) ایران کی انقلابی گارڈ فورس (IRGC) نے اسرائیل کے لیے مبینہ طور پر جاسوسی کرنے والے 73 افراد کو گرفتار کرنے کا دعویٰ کیا ہے۔

ایرانی حکام کے مطابق یہ گرفتاریاں ایک منظم اور خفیہ آپریشن کے نتیجے میں کی گئیں، جس کے دوران ان افراد کو حراست میں لیا گیا جن پر اسرائیلی خفیہ ایجنسی “موساد” سے روابط رکھنے اور اہم معلومات فراہم کرنے کا الزام ہے۔

ذرائع کے مطابق، زیر حراست افراد میں بڑی تعداد بھارتی شہریوں کی ہے۔ حکام کا کہنا ہے کہ یہ افراد ایرانی سکیورٹی اداروں کی جانب سے کافی عرصے سے نگرانی میں تھے، اور اب ان کے خلاف شواہد اکٹھے ہونے پر کارروائی عمل میں لائی گئی۔

ایرانی سکیورٹی اداروں نے الزام لگایا ہے کہ یہ نیٹ ورک ایران کی سلامتی کے خلاف سرگرم تھا اور حساس نوعیت کی معلومات اسرائیل کو منتقل کر رہا تھا، جس سے قومی مفادات کو سنگین خطرات لاحق ہوئے۔

حکام نے عندیہ دیا ہے کہ تفتیش کا دائرہ مزید وسیع کیا جا رہا ہے اور امکان ہے کہ آئندہ دنوں میں مزید گرفتاریاں بھی عمل میں لائی جائیں۔

اس معاملے پر نہ تو بھارت اور نہ ہی اسرائیل کی جانب سے کوئی سرکاری بیان جاری کیا گیا ہے۔