اسلام آباد (نیوز ڈیسک) ایران کی جانب سے اسرائیل پر ہونے والے حالیہ میزائل حملوں کے نتیجے میں تل ابیب میں شدید دھماکوں کی آوازیں گونجیں، جنہیں مقامی رہائشیوں نے ماضی کی نسبت کہیں زیادہ “خطرناک اور شدید” قرار دیا۔
اسرائیل کے معروف صحافی گدیون لیوی نے الجزیرہ ٹی وی سے بات کرتے ہوئے بتایا کہ وہ ان دھماکوں کے وقت ایک نزدیکی پناہ گاہ میں موجود تھے اور انہیں آوازیں بالکل اپنے گھر کے آس پاس محسوس ہوئیں۔ ان کا کہنا تھا، “خوش قسمتی سے میں نے کوئی تباہی نہیں دیکھی، مگر دھماکوں کی گونج نے واضح کر دیا کہ صورتحال معمولی نہیں تھی۔”
گدیون لیوی نے بتایا کہ جیسے ہی وہ پناہ گاہ سے باہر آئے، پڑوسیوں نے بتایا کہ کچھ گھروں کی کھڑکیوں کے شیشے ٹوٹ چکے ہیں۔ ان کا کہنا تھا کہ یہ سب کچھ ان کے گھر کے قریبی علاقے میں پیش آیا، اگرچہ وہ درست مقام نہیں جانتے، لیکن دھماکوں کی شدت غیر معمولی تھی۔
انہوں نے مزید کہا کہ کچھ ہی دیر بعد ایمبولینسوں اور ریسکیو ٹیموں کی گاڑیاں موقع پر پہنچنا شروع ہو گئیں، جن کے سائرن سے ماحول مزید سنجیدہ ہو گیا۔
گفتگو کے اختتام پر انہوں نے اعتراف کیا کہ وہ تفصیلات سے زیادہ واقف نہیں، مگر یہ بات یقینی ہے کہ حملہ بہت خوفناک اور خطرناک تھا۔
