تہران (نمائندہ خصوصی) ایران کی فوج نے ایک اور جدید اسرائیلی جنگی طیارہ F-35 مار گرانے کا دعویٰ کیا ہے۔ سرکاری خبر رساں ادارے “مہر” کے مطابق، ایرانی فضائی دفاعی نظام نے ملک کے مغربی علاقے میں اسرائیل کے جدید ترین لڑاکا طیارے کو نشانہ بنایا۔
رپورٹ میں بتایا گیا ہے کہ طیارہ تباہ ہونے سے قبل اس کا پائلٹ ایجیکشن کے ذریعے جہاز سے نکلنے میں کامیاب ہو گیا، تاہم ایرانی اسپیشل فورسز نے فوری کارروائی کرتے ہوئے اسے حراست میں لے لیا۔ فوجی ذرائع کا کہنا ہے کہ واقعے کی مزید تفصیلات جلد جاری کی جائیں گی۔
واضح رہے کہ گزشتہ رات بھی ایرانی میڈیا نے دعویٰ کیا تھا کہ ایران نے دو اسرائیلی ایف 35 طیارے مار گرائے ہیں، جن میں سے ایک کی پائلٹ خاتون تھیں اور انہیں بھی گرفتار کر لیا گیا تھا۔ تاہم اسرائیل نے ان دعوؤں کو مسترد کرتے ہوئے کہا تھا کہ ان کے کسی بھی طیارے کو نقصان نہیں پہنچا۔
یہ دعویٰ ایسے وقت سامنے آیا ہے جب ایران اور اسرائیل کے درمیان کشیدگی میں مسلسل اضافہ ہو رہا ہے، اور دونوں ممالک ایک دوسرے کے خلاف عسکری طاقت کے مظاہرے کر رہے ہیں۔
