اسلام آباد (نیوز ڈیسک) ایران نے امریکا کو خبردار کیا ہے کہ اگر دونوں ممالک کے درمیان کوئی تنازع کھڑا ہوتا ہے تو ایران مشرق وسطیٰ میں قائم امریکی فوجی اڈوں کو ہدف بنائے گا۔ بین الاقوامی میڈیا رپورٹس کے مطابق ایرانی وزیر دفاع عزیز ناصر زادے نے واضح کیا ہے کہ اگر ایران پر امریکا کی جانب سے حملہ کیا گیا تو ایران بھرپور جوابی کارروائی کرے گا۔

ناصر زادے کا کہنا تھا کہ اگرچہ ایران چاہتا ہے کہ حالات کشیدہ نہ ہوں اور جوہری معاہدے سے متعلق بات چیت مثبت انداز میں آگے بڑھے، لیکن اگر جنگ مسلط کی گئی تو ایران دشمن کو بھاری قیمت چکانے پر مجبور کر دے گا۔ انہوں نے مزید کہا کہ کسی بھی حملے کی صورت میں امریکا کو اس خطے سے انخلا کرنا پڑے گا۔

دوسری جانب امریکی صدر ڈونلڈ ٹرمپ نے اس خدشے کا اظہار کیا ہے کہ ایران کے ساتھ نیا جوہری معاہدہ طے پانے کے امکانات کم ہو رہے ہیں۔ یاد رہے کہ ایران اور امریکا کے درمیان 2015ء میں ہونے والے جوہری معاہدے کو دوبارہ بحال کرنے کے لیے اپریل سے لے کر اب تک پانچ دور کے مذاکرات ہو چکے ہیں، تاہم کسی حتمی نتیجے پر تاحال پہنچا نہیں جا سکا۔