اسلام آباد (نیوز ڈیسک) ادھر یوکرین اور روس کے درمیان جاری جنگ میں ایک اور سنگین موڑ سامنے آیا ہے۔ یوکرینی حکام کا کہنا ہے کہ روس نے ملک پر بڑے پیمانے پر ڈرونز اور میزائلوں سے حملے کیے، جن میں یوکرینی فضائی دفاع نے بڑی تعداد میں ڈرونز اور میزائلوں کو تباہ کر دیا۔

روئٹرز کے مطابق، یوکرینی فضائیہ نے دعویٰ کیا ہے کہ روس کی جانب سے داغے گئے 479 ڈرونز میں سے 460 کو نشانہ بنا کر تباہ کر دیا گیا، جبکہ 20 میزائلوں میں سے 19 کو بھی ناکارہ بنا دیا گیا۔ یہ حملے ایک ایسے وقت میں ہوئے جب یوکرین نے روس کے اندر گھس کر اس کے کئی بمبار طیاروں کو تباہ کیا تھا۔روس کی وزارت دفاع نے ان حملوں کی تصدیق کرتے ہوئے کہا کہ یہ کارروائی یوکرین کی جانب سے رواں ماہ روسی فضائی اڈوں پر کیے گئے حملوں کے ردِعمل میں کی گئی، اور تمام اہداف کو کامیابی سے نشانہ بنایا گیا ہے۔

یوکرینی حکام نے بتایا کہ ان میں سے ایک روسی حملہ مغربی یوکرین کے شہر ڈوبنو میں موجود ایک اہم اڈے پر ہوا، جو پولینڈ کی سرحد سے تقریباً 60 کلومیٹر کے فاصلے پر واقع ہے۔ پولش فوج نے اس پیش رفت کے بعد اپنی فضائی حدود کو محفوظ بنانے کے لیے اتحادی طیاروں کی مدد سے فوری فضائی دفاعی کارروائی کی۔