اسلام آباد (نیوز ڈیسک) بھارتی پولیس نے ایک اور سوشل میڈیا شخصیت کو پاکستان کے لیے مبینہ جاسوسی کے الزام میں حراست میں لے لیا ہے۔ بھارتی میڈیا رپورٹس کے مطابق، یوٹیوب پر معروف جسبیر سنگھ کو سیکیورٹی اداروں نے گرفتار کر لیا ہے۔
ذرائع کا کہنا ہے کہ جسبیر سنگھ پر الزام ہے کہ اس کے پاکستان کی خفیہ ایجنسیوں کے ساتھ روابط تھے اور وہ ماضی میں تین مرتبہ—2020، 2021 اور 2024 میں—پاکستان کا سفر بھی کر چکا ہے۔ بھارتی تفتیشی حکام کے مطابق، اس نے اپنے تعلقات چھپانے کے لیے گرفتاری سے قبل اپنے موبائل اور دیگر ڈیجیٹل آلات سے کئی اہم شواہد مٹانے کی کوشش بھی کی۔
تحقیقات میں مزید یہ بات سامنے آئی ہے کہ جسبیر سنگھ کا رابطہ پاکستان ہائی کمیشن میں تعینات ایک اہلکار احسان الرحیم المعروف “دانش” سے تھا، جسے حالیہ دنوں میں بھارت سے بے دخل کر دیا گیا تھا۔ اس کے علاوہ، جسبیر کا تعلق مبینہ طور پر پاکستانی انٹیلی جنس افسر “شاکر عرف جٹ رندھاوا” سے بھی رہا ہے۔
پولیس حکام نے دعویٰ کیا ہے کہ جسبیر سنگھ نے دہلی میں منعقدہ پاکستان کے یومِ آزادی کی تقریب میں شرکت کی تھی جہاں وہ پاکستانی نمائندوں اور وی لاگرز سے بھی ملا۔ اس کے قبضے سے حاصل شدہ الیکٹرانک سامان میں کچھ پاکستانی نمبرز اور مشتبہ مواد بھی برآمد کیا گیا ہے۔
موہالی کے اسپیشل آپریشن سیل میں اس کے خلاف مقدمہ درج کر لیا گیا ہے، اور حکام کا کہنا ہے کہ تحقیقات کا دائرہ مزید وسیع کیا جا رہا ہے تاکہ اس مبینہ جاسوسی نیٹ ورک سے وابستہ دیگر افراد کو بھی بے نقاب کیا جا سکے۔
خیال رہے کہ اس سے قبل یوٹیوبر جیوتی ملہوترا کو بھی ایسے ہی الزامات کے تحت گرفتار کیا گیا تھا۔
