اسلام آباد (نیوز ڈیسک) کویت نے تقریباً دو دہائیوں کے بعد پاکستانیوں کے لیے ویزا پابندی اٹھا لی ہے، جس سے پاکستان کے لیے خلیجی روزگار اور کاروباری مواقع کی نئی راہیں کھل گئی ہیں۔
وزارتِ اوورسیز پاکستانیز کے فوکل پرسن مصطفیٰ ملک نے تصدیق کرتے ہوئے کہا کہ اب پاکستانی شہریوں کے لیے کویت میں ورک ویزا، فیملی ویزا، وزٹ ویزا، سیاحتی ویزا اور کمرشل ویزا دوبارہ دستیاب ہوں گے۔ ان کا کہنا تھا کہ دنیا پاکستانی ہنر مندوں کی صلاحیتوں کو تسلیم کرتے ہوئے اُن کے لیے مواقع پیدا کر رہی ہے۔
انہوں نے بتایا کہ ویزے کے حصول کے لیے آن لائن درخواست کا طریقہ کار متعارف کروایا گیا ہے، جس کے ذریعے پاکستانی افراد آسانی سے ویزے حاصل کر سکیں گے۔ اس فیصلے سے ہزاروں پاکستانیوں کو کویت میں روزگار، کاروبار اور سیاحت کے مواقع میسر آئیں گے۔
فوکل پرسن نے یہ بھی کہا کہ اٹلی نے پاکستانی ورکرز کے لیے سالانہ کوٹہ مقرر کرنے پر آمادگی ظاہر کی ہے اور اس ضمن میں دونوں ملکوں کے درمیان مفاہمتی یادداشت (ایم او یو) پر دستخط ہو چکے ہیں۔ ان کے مطابق خلیجی ریاستوں سمیت کئی ممالک پاکستان سے تربیت یافتہ افرادی قوت حاصل کرنے میں دلچسپی رکھتے ہیں۔
