اسلام آباد (نیوذ ڈیسک )جاپان کی مشہور مانگا آرٹسٹ ریو تاتسوکی کی ایک نئی پیشگوئی نے بین الاقوامی سطح پر تشویش کی لہر دوڑا دی ہے۔ ان کی اس پیشگوئی کے بعد ہزاروں غیر ملکی سیاحوں نے رواں سال جولائی میں جاپان کا سفر منسوخ کر دیا ہے۔ریو تاتسوکی، جنہیں اب جاپان کی “نئی بابا وانگا” بھی کہا جا رہا ہے، اپنی ماضی کی درست ثابت ہونے والی پیشگوئیوں کی وجہ سے شہرت رکھتی ہیں۔

انہوں نے 2011 میں شمال مشرقی جاپان میں آنے والے توہوکو زلزلے اور معروف گلوکار فریڈی مرکری کی موت کی پیشگی نشاندہی کی تھی۔اب ان کی نئی کتاب “The Future I Saw” میں خبردار کیا گیا ہے کہ جولائی 2025 میں جاپان اور فلپائن کے درمیانی سمندری علاقے میں ایک طاقتور زلزلہ اور سونامی آ سکتا ہے، جو مبینہ طور پر 2011 کے سونامی سے بھی تین گنا زیادہ تباہ کن ہو سکتا ہے۔

اس پیشگوئی کے بعد، ہانگ کانگ کی معروف ٹریول کمپنی WWPKG نے بتایا کہ جاپان جانے والے سیاحوں کی تعداد میں تقریباً 50 فیصد تک کمی آ چکی ہے۔ سونامی کے خدشات نے لوگوں کو اپنے محفوظ سفری منصوبے دوبارہ سوچنے پر مجبور کر دیا ہے۔اگرچہ جاپانی حکومت نے ریو تاتسوکی کی اس پیشن گوئی کو غیر سائنسی قرار دے کر مسترد کر دیا ہے، تاہم چین کے سفارتخانے نے اپریل 2025 میں جاپان میں مقیم اپنے شہریوں کو ممکنہ قدرتی آفات سے محتاط رہنے کی ہدایات جاری کی تھیں، جس سے عوامی تشویش مزید بڑھ گئی۔دوسری جانب، سوشل میڈیا پلیٹ فارمز پر #July2025Prediction کا ہیش ٹیگ ٹرینڈ کر رہا ہے، جہاں صارفین کی آرا منقسم ہیں۔ کچھ لوگ اس انتباہ کو سنجیدگی سے لے رہے ہیں، جبکہ دیگر اسے محض اتفاق یا خیالی اندازہ قرار دے رہے ہیں۔