اسلام آباد (نیوز ڈیسک) بھارتی ریاست اتر پردیش کے شہر میرٹھ میں ایک دل دہلا دینے والا واقعہ پیش آیا، جہاں ایک خاتون نے اپنے عاشق کے ساتھ مل کر اپنے شوہر کو بے دردی سے قتل کر دیا۔ واقعے کے مطابق، مرچنٹ نیوی کے افسر سوربھ راجپوت کو اس کی بیوی مسکان رستوگی اور اس کے آشنا ساحل شکلا نے بے رحمی سے موت کے گھاٹ اتار کر اس کی لاش کے 15 ٹکڑے کر دیے اور انہیں سیمنٹ سے بھرے ڈرم میں چھپا دیا۔
بھارتی میڈیا کے مطابق، سوربھ اور مسکان کی شادی 2016 میں ہوئی تھی اور ان کی ایک پانچ سالہ بیٹی بھی ہے۔ 2020 میں سوربھ نے مرچنٹ نیوی میں نوکری اختیار کی، جس کی وجہ سے اسے اکثر گھر سے دور رہنا پڑتا تھا۔ اسی دوران، اس کی بیوی نے اپنے پڑوسی ساحل شکلا کے ساتھ تعلقات استوار کر لیے۔ کچھ عرصہ قبل جب سوربھ کو اپنی بیوی کے ناجائز تعلقات کا علم ہوا تو میاں بیوی کے درمیان شدید جھگڑے ہونے لگے۔
رپورٹس کے مطابق، 4 مارچ کو مسکان نے اپنے شوہر کے کھانے میں بے ہوشی کی دوا ملا دی، جس کے بعد جب وہ بے سدھ ہو گیا تو اس نے ساحل شکلا کو بلا کر سوربھ کے سینے پر چاقو سے کئی وار کروائے۔ اس دوران ان کی کم سن بیٹی دوسرے کمرے میں سو رہی تھی۔ قتل کے بعد دونوں ملزمان نے لاش کو باتھ روم میں لے جا کر تیز دھار آلے سے 15 حصوں میں کاٹا اور پھر ایک بڑے پلاسٹک کے ڈرم میں ڈال کر سیمنٹ سے بھر دیا، تاکہ کسی کو اس کی موجودگی کا پتہ نہ چلے۔
قتل کے بعد مسکان نے اپنی بیٹی کو والدین کے گھر چھوڑا اور ساحل شکلا کے ساتھ شملہ کی سیر پر روانہ ہو گئی۔ تاہم، اس کی ماں کو اس پر شک ہونے لگا۔ بار بار سوال کرنے پر مسکان نے اپنے جرم کا اعتراف کر لیا، جس کے بعد اس کے والدین نے اسے پولیس کے حوالے کر دیا۔ پولیس تفتیش کے دوران، مسکان نے شوہر کے قتل کا مکمل اعتراف کر لیا۔
پولیس نے فوری کارروائی کرتے ہوئے ملزمہ مسکان اور اس کے ساتھی ساحل شکلا کو گرفتار کر لیا اور لاش کے ٹکڑے برآمد کر لیے ہیں۔ دونوں ملزمان سے مزید تفتیش جاری ہے۔
