اسلام آباد (نیوز ڈیسک) بھارت کے شہر ممبئی کے علاقے نالا سوپارا میں ایک 13 سالہ لڑکے نے مبینہ طور پر حسد کے باعث اپنی چھ سالہ کزن کو قتل کر دیا۔ اطلاعات کے مطابق، لڑکا ہندی فلم “رامن راگھو” سے متاثر تھا اور اس نے لڑکی کو ایک ویران پہاڑی مقام پر لے جا کر جان سے مار دیا۔

ذرائع کے مطابق، ملزم کو یہ احساس تھا کہ اس کے والدین اس سے کم اور اس کی کزن سے زیادہ محبت کرتے ہیں، جس کی وجہ سے وہ اس سے حسد محسوس کرتا تھا۔ نیوز 18 کے مطابق، مقتولہ لڑکی اور ملزم کے اہلِ خانہ ایک ہی مکان میں مقیم تھے۔ واقعے کے روز شام کے وقت جب بچی گھر کے باہر کھیل رہی تھی تو اچانک لاپتہ ہو گئی۔ گھر والوں نے اسے ہر جگہ تلاش کیا، مگر اس کا کوئی سراغ نہ ملا۔ بعد میں قریبی سی سی ٹی وی فوٹیج کی جانچ کے دوران 13 سالہ لڑکے کو مقتولہ کے ساتھ پہاڑی کی طرف جاتے دیکھا گیا، لیکن وہ اکیلا واپس آیا۔

پولیس کی تفتیش کے دوران، پہلے تو لڑکے نے یہ دعویٰ کیا کہ پہاڑی پر دو نامعلوم افراد نے ان پر حملہ کیا اور وہ کسی طرح جان بچا کر واپس آیا۔ تاہم، جب حکام نے مزید سوالات کیے تو اس کے بیانات میں تضادات سامنے آئے۔ سخت تفتیش کے بعد، اس نے اعتراف کر لیا کہ اس نے اپنی کزن کو پہلے گلا گھونٹ کر مارنے کی کوشش کی، اور پھر اس کے سر پر پتھر مار کر اسے ہلاک کر دیا۔ بعد میں، اس نے پولیس کو جائے وقوعہ پر لے جا کر لاش برآمد کروا دی۔

پولیس نے کمسن ملزم کو حراست میں لے کر جووینائل ہوم منتقل کر دیا ہے، جبکہ مقتولہ کی لاش کو پوسٹ مارٹم کے لیے اسپتال بھجوا دیا گیا ہے۔