اسلام آباد (نیوزڈیسک) متحدہ عرب امارات نے ویزا تجدید اور اقامتی امور کو مزید تیز اور سہل بنانے کے لیے مصنوعی ذہانت (AI) پر مبنی جدید سسٹم ’سلامہ‘ متعارف کروا دیا۔جنرل ڈائریکٹوریٹ آف ریذیڈنسی اینڈ فارنرز افیئرز (GDRFA) دبئی کے مطابق یہ جدید ڈیجیٹل پلیٹ فارم صارفین کو محض چند سیکنڈز میں ویزا کی تجدید، ادائیگی اور دیگر اقامتی خدمات مکمل کرنے کی سہولت فراہم کرے گا۔لیفٹیننٹ جنرل محمد احمد المری نے کہا کہ اس جدید نظام کا مقصد نہ صرف خدمات کو بہتر بنانا ہے بلکہ حکومتی امور کو بھی زیادہ مؤثر اور صارف دوست بنانا ہے۔

کولونیل خالد بن مدیا الفلاسی نے وضاحت کی کہ ’سلامہ‘ جدید الگورتھمز کی مدد سے ویزا درخواستوں کو چند لمحوں میں پراسیس کر سکتا ہے۔ یہ سسٹم 40 سے زائد زبانوں کو سپورٹ کرتا ہے اور مستقبل میں مزید زبانوں کا اضافہ متوقع ہے۔یو اے ای پاس کے ذریعے لاگ ان ہونے پر یہ نظام صارف کی معلومات کو خودکار طریقے سے شناخت کر کے متعلقہ دستاویزات فراہم کرتا ہے اور ویزا کی فوری تجدید ممکن بناتا ہے۔ اس نئی ٹیکنالوجی کا عملی مظاہرہ اس وقت دیکھنے میں آیا جب ایک فرد نے محض چند سیکنڈز میں اپنا ویزا تجدید کر لیا۔آنے والے دنوں میں یہ سسٹم کمپنیوں کے لیے بھی دستیاب ہوگا، جس سے دبئی کی ڈیجیٹل ٹرانسفارمیشن اسٹریٹجی کو مزید تقویت ملے گی۔