اسلام آباد (نیوز ڈیسک)سعودی شاہی خاندان کے رکن شہزادہ محمد بن فہد بن عبدالعزیز آل سعود انتقال کر گئے۔سعودی پریس ایجنسی کے مطابق شاہی دیوان کی جانب سے جاری کیے گئے اعلامیے میں بتایا گیا ہے کہ شہزادہ محمد بن فہد بن عبدالعزیز اب اس دنیا میں نہیں رہے۔
شاہی دیوان کے بیان میں یہ بھی کہا گیا ہے کہ ان کی نماز جنازہ بدھ کے روز ریاض کی جامع مسجد امام ترکی بن عبد اللہ میں عصر کی نماز کے بعد ادا کی جائے گی۔شاہی خاندان نے مرحوم کے لیے دعا کرتے ہوئے اللہ تعالیٰ سے ان کی مغفرت، رحمت اور درجات کی بلندی کی دعا کی ہے۔واضح رہے کہ شہزادہ محمد بن فہد، سعودی عرب کے مرحوم فرمانروا شاہ فہد بن عبدالعزیز کے صاحبزادے تھے اور وہ ماضی میں مشرقی صوبے کے گورنر کے عہدے پر بھی فائز رہے ہیں۔
