قاہرہ (این این آئی)مصری محکمہ صحت نے کہاہے کہ کرونا وائرس پارلیمنٹ میں داخل ہوگیا ہے۔ ایک خاتون رکن پارلیمنٹ کا کرونا کا ٹیسٹ مثبت آیا ہے جس کے بعد انہیں الگ تھلگ کردیا گیا ہے اور ان کا علاج جاری ہے۔میڈیارپورٹس کے مطابق واٹس ایپ ایپلی کیشن کے ایک گروپ کے ذریعہ مصری پارلیمنٹ کے ارکان نے اپنی کولیگ قاہرہ گورنری سے رکن پارلیمنٹ شیرین فراج کی
کرونا کا شکار ہونے کی تصدیق کی۔ انہیں قصر العینی اسپتال کے آئیسولیشن وارڈ منتقل کر دیا گیا ہے۔مصری پارلیمنٹ کے سکریٹری جنرل محمود فوزی نے بتایا کہ انہیں خاتون رکن کے کرونا کا شکار ہونے کی مصدقہ اطلاعات نہیں ملی ہیں۔ انہوں نے کہا کہ آئندہ اتوار کو پارلیمنٹ کا اجلاس منعقد کیا جائے گا۔قبل ازیں مصری ذرائع ابلاغ نے خبر دی تھی کہ وزیر صحت کی معاون خصوصی نیفین النحاس بھی کرونا کا شکار ہوگئی ہیں۔ کرونا کا شکار ہونے کے بعد انہیں 9 مئی کو اسماعیلیہ گورنری میں ابو خلیفہ اسپتال منتقل کر دیا گیا ہے۔
