جنیوا (این این آئی ) عالمی ادارہ صحت(ڈبلیو ایچ او) نے خبردار کیا ہے کہ 2021ء کے اختتام سے قبل کرونا کی کسی ویکسین کی تیاری کا امکان نہیں۔غیرملکی خبررساں ادارے کے مطابق عالمی ادارہ صحت کے ایک سینئر عہدے دار ڈیل فشر نے کہاکہ کرونا کی ویکسین کی 2021 کے اختتام سے قبل دستیابی کا امکان نہیں ۔
انھوں نے امریکی نشریاتی ادارے سے ایک انٹرویو میں کہا کہ میرے خیال میں اگلے سال کا اختتام بہت مناسب توقع ہوگی۔ڈیل فشر ڈبلیو ایچ او کے عالمی وَبا الرٹ اور ردعمل نیٹ ورک کے سربراہ ہیں۔انھوں نے خبردار کرتے ہوئے کہا کہ لوگوں کو اپنی توقعات کا بغور جائزہ لینے کی ضرورت ہے۔میرے خیال میں اندھیرے میں ٹامک ٹوئیے مارنے کے بجائے آپ وہی کررہے ہیں جو آپ چاہتے ہیں کیونکہ اس کی آپ کو ضرورت ہے۔انھوں نے اس کی یہ وضاحت کی کہ اس وقت ویکسین کلینیکل آزمائش سے گزر رہی ہے اور یہ تیاری کے عمل کا پہلا مرحلہ ہے۔اس کے بعد اس کو دوسرے اور تیسرے مرحلے سے گزرنا ہے اور اس بات کو یقینی بنانا ہوگا کہ یہ ویکسین محفوظ اور قابل اعتبار ہے۔اگر ویکسین کرونا کے علاج میں مؤثرثابت بھی ہوجاتی ہے تو پھر اس کے بعد اس کی بڑی پیمانے پر تیاری اور دنیا بھر میں تقسیم کے مراحل درپیش ہوں گے اور یہ بہ ذات خود قدرے طویل مرحلے ہیں۔
