کابل(این این آئی ) افغانستان کے صوبے خوست کے پولیس چیف بریگیڈیئر جنرل سید احمد ببازی دو اہلکاروں سمیت بم دھماکے میں ہلاک ہوگئے۔ خوست پولیس چیف بریگیڈیئر جنرل سید احمد ببازی کو شدید زخمی حالت میں اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گئے۔ بریگیڈیئر جنرل سید احمد ببازی پر عسکریت پسندوں کے خلاف آپریشن کے دوران حملہ کیا گیا۔
عالمی خبر رساں ادارے کے مطابق افغانستان کے صوبے خوست میں سڑک کنارے نصب بم اس وقت زوردار دھماکے سے پھٹ گیا جب وہاں سے صوبے کے پولیس چیف کی گاڑی گزر رہی تھی۔ دھماکے میں بریگیڈیئر جنرل سید احمد ببازی شدید زخمی ہوگئے جب کہ دو اہلکار موقع پر ہی ہلاک ہوگئے۔صوبے خوست کے گورنر کے ترجمان نے میڈیا کو بتایا کہ خوست پولیس چیف بریگیڈیئر جنرل سید احمد ببازی کو شدید زخمی حالت میں اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گئے۔ بریگیڈیئر جنرل سید احمد ببازی پر عسکریت پسندوں کے خلاف آپریشن کے دوران حملہ کیا گیا تھا۔خوست کے مقامی طالبان قیادت نے پولیس چیف پر حملے کی ذمہ داری قبول کرتے ہوئے کہا کہ ساتھی جنگجووں کی ہلاکت کا بدلہ لیا گیا ہے، اگر ہم پر کارروائیاں بند نہ ہوئیں تو ایسے حملے جاری رہیں گے۔ادھر امریکا کے خصوصی مندوب برائے افغانستان زلمے خلیل زاد نے گزشتہ روز ہی طالبان قیادت سے بات چیت کی ہے جس میں افغان فوج کے خلاف عسکری کارروائیاں بند کرنے کا مطالبہ کیاتھا۔
