تہران (این این آئی)غیر ملکی میڈیا کے مطابق ایران کی وزارت صحت کے ترجمان کیانوش جہانپور نے کہا کہ چوبیس گھنٹے میں ملک میں کورونا سے 47 اموات ہوئیں جو گزشتہ 55 روز میں سب سے کم ہیں۔انہوں نے نیوز کانفرنس میں کہا کہ انہیں امید ہے کہ آنے والے دنوں میں یہ سلسلہ جاری رہے گا۔ان کا یہ بیان ایرانی صدر حسن روحانی اس خطاب کے بعد آیا جس میں انہوں نے کہا کہ 132 کاؤنٹیز یعنی ملک کے

ایک تہائی انتظامی ڈویڑنز میں پیر سے مساجد کھل جائیں گی۔ایران کی کورونا وائرس ٹاسک فورس سے خطاب میں انہوں نے کہا کہ سماجی فاصلہ رکھنا اس وقت اجتماعی طور پر عبادت کرنے سے زیادہ ضروری ہے۔حسن روحانی نے کہا کہ ‘جن کاؤنٹیز میں مساجد کھولنے کی اجازت دی گئی ہے وہاں کورونا کا کم خطرہ ہے۔ایرانی صدر حسن روحانی نے دعویٰ کیا کہ حالیہ ہفتوں میں ہسپتالوں میں وائرس سے ممکنہ طور پر متاثر ہونے والے افراد کے آنے کی شرح بہت کم ہوگئی ہے۔حسن روحانی نے کہا کہ ہم آہستہ آہستہ معاشی سرگرمیوں کی بحالی کا سلسلہ جاری رکھیں گے۔تاہم انہوں نے خبردار کرتے ہوئے کہا کہ ملک کو بْری صورتحال کے لیے بھی تیار رہنا چاہیے۔دوسری جانب ایران کے پاسداران انقلاب نے اعلان کیا ہے کہ وہ کورونا وائرس کی وجہ سے اسرائیل کے خلاف احتجاج کا دن یعنی یوم قدس کو منسوخ کر رہے ہیں۔ایران کی نیم سرکاری خبر ایجنسی نے پاسداران انقلاب کے ترجمان رمضان شریف کا حوالہ دیتے ہوئے کہا کہ یہ قدم ملک میں دیگر تمام اجتماعات کی منسوخی اور مقدس مقامات کی بندش کے تناظر میں اٹھایا گیا ہے،ہمیں اس کی فکر نہیں کرنی چاہیے کہ ہمارا دشمن اس پر کیا کہے گا۔ایران میں 1979 میں اسلامی انقلاب کے بعد سے ہر سال یہ دن فلسطینیوں سے اظہار یکجہتی کے لیے رمضان کے آخری جمعہ کو منایا جاتا ہے۔