دمشق (این این آئی)شام کے دارالحکومت دمشق میں قائم پاکستانی قونصل خانے کے ایک ڈرائیور نے ایک سفارت کار کے ساتھ مبینہ طور پر مالی امور سے متعلق تنازع پر خودکشی کی کوشش کی تاہم اسے بچالیا گیا۔ دفتر خارجہ کے ترجمان ڈاکٹر محمد فیصل کے مطابق وزارت خارجہ کو دمشق میں پاکستانی سفارت خانے کے ڈرائیور محمد اقبال کے ساتھ پیش آنے والے واقعے کی اطلاعات موصول ہوگئی ہیں۔انہوں نے کہا کہ محمد اقبال کا علاج جاری ہے اور ان کی حالت اب بہتر ہے۔انہوں نے کہاکہ وزارت خارجہ اس
معاملے کا جائزہ لے رہی ہے جبکہ مزید تفصیلات بھی حاصل کی جارہی ہیں۔ذرائع ابلاغ کی رپورٹس کے مطابق خودکشی کی کوشش کرنے والے ڈرائیور محمد اقبال کا کہنا تھا کہ اس نے قونصلر مطیع الرحمٰن باجوہ کے پاس اپنی کچھ رقم بطور امانت رکھوائی تھی۔انہوں نے کہا کہ جب انہوں نے اپنی رقم کی واپسی کا مطالبہ کیا تو قونصلر نے کسی بھی رقم کے بطور امانت رکھے جانے سے انکار کیا۔مذکورہ ڈرائیور نے موقف اختیار کیا کہ اس نے اپنی محنت کی کمائی نہ ملنے کی وجہ سے خود کشی کی کوشش کی۔
