دبئی (این این آئی) متحدہ عرب امارات (یو اے ای) نے بھارتی وزیر اعظم نریندر مودی کو اپنے ملک کا سب سے بڑا شہری اعزاز زاید میڈل دیدیا اس حوالے سے ابوظہبی کے ولی عہد شیخ محمد بن زاید النہیان نے سماجی رابطوں کی ویب سائٹ پر اعلان کیا کہ یو اے ای کے صدر شیخ خلیفہ نے نریندر مودی کو یہ ایوارڈ دیا۔انہوں نے لکھا کہ بھارت کے ساتھ ہمارے تاریخی اور وسیع اسٹریٹجک تعلقات ہیں، میرے عزیز دوست وزیر اعظم نریندر مودی کے اہم کردار نے ان تعلقات کو مزید تقویت دی۔شیخ محمد بن زاید النہیان نے لکھا کہ نریندر مودی کی ’خدمات‘ کے اعتراف میں
متحدہ عرب امارات کے صدر نے انہیں زاید میڈل سے نوازا۔ادھر بھارتی وزیر اعظم نریندر مودی نے یو اے ای کے لیڈر کی انتہائی عاجزی سے شکریہ ادا کرتے ہوئے لکھا کہ ولی عہد کی وڑنری قیادت میں نئی دہلی اور ابوظہبی کے درمیان تعلقات مستحکم ہوئے۔دوسری بھارتی وزیر خارجہ سشما سوراج نے بھارتی عوام کی طرف سے‘ یو اے ای کے صدر شیخ خلیفہ اور ولی عہد کا شکریہ ادا کیا۔ٹوئٹر پر انہوں نے لکھا کہ یہ میڈل ’یو اے ای کے ساتھ اسٹریٹجک تعلقات اور اسلامی دنیا کے ساتھ تعلقات کو نئے دور میں لانے میں وزیر اعظم کے کردار کا اعتراف ہے۔
