واشنگٹن(این این آئی)وائٹ ہاؤس نے خبردار کیا ہے کہ روس یا دیگر ممالک وینزویلا میں صدر نکولاس مادورو کی مدد کے لیے اپنے فوجی دستے وہاں بھیجنے سے اجتناب کریں۔غیرملکی خبررساں ادارے کے مطابق ایک بیان میں وائٹ ہاؤس کے ایک ترجمان نے کہاکہ ایسی کسی بھی صورت میں امریکا اسے خطے کی سلامتی کے لیے براہ راست خطرہ تصور کرے گا۔
اس سے قبل بتایا گیا تھا کہ دو روسی عسکری طیارے وینزویلا کے دارالحکومت کراکس میں اترے تھے، جن میں سو روسی فوجی اور سائبر سکیورٹی اہلکار سوار تھے۔ اس سے پہلے امریکی صدر ٹرمپ نے کہا تھا کہ روس وینزویلا سے نکل جائے جب کہ جمعے کے روز ٹرمپ کے قومی سلامتی کے مشیر جان بولٹن نے بھی روس کو سخت الفاظ میں خبردار کیا۔
