ابوظہبی (آن لائن ) متحدہ عرب امارات کے وزیر خارجہ شیخ عبد اللہ بن زائد النہیان نے کہا ہے کہ اسلامی تعاون تنظیم (او آئی سی )ایک روز کے لئے بھارت کو اپنی صفوں میں قبول کر لے گی ۔ٰخبر رساں ادارے کے مطابق شیخ عبداللہ بن زائد النہیان نے اسلامی وزراء خارجہ کونسل کے 46 ویں اجلاس کے اختتام پر پریس کانفرنس سے خطاب کرتے ہوئے کہا کہ او آئی سی نے بھارت کو نہایت واضح اور مثبت پیغام دیا ہے ۔
انہوں نے کہا کہ اسلامی کانفرنس تنظیم بھارت سے تعلقات کو قدر کی نظر سے دیکھتی اور انہیں مضبوط کرنے کی خواہاں ہے۔ اماراتی وزیر خارجہ نے او آئی سی اجلاس میں بھارت کی شرکت کو تاریخی لمحہ قرار دے دیا ۔انہوں نے بھارتی وزیر خارجہ سشما سوراج کے اس موقع پر خطاب کو سراہا لیکن ایک بھارتی صحافی کی جانب سے کشمیر پر قرارداد کے بارے میں شکایت اور سوال پر انہوں نے اس کا دفاع کیا۔
