نئی دہلی (این این آئی) بھارتی میڈیا کا جیش محمد کے سربراہ مولانا مسعود اظہر کے انتقال کا دعویٰ غلط نکلا۔بھارتی میڈیا نے خبر چلائی کہ مولانا مسعود اظہر راولپنڈی کی ملٹری ہسپتال میں زیر علاج تھے، جو گزشتہ روز انتقال کرگئے۔قریبی ذرائع کے مطابق مسعود اظہر کے اہلخانہ نے اس بات کی تصدیق کی ہے کہ جیش محمد کے سربراہ زندہ ہیں۔پاکستان کے وزیر خارجہ شاہ محمود قریشی نے مسعود اظہر کے انتقال کی بھارتی میڈیا رپورٹ پر کہا کہ میرے پاس کوئی اطلاع نہیں ہے۔
انہوں نے نجی ٹی وی سے گفتگو میں کہا کہ میں مسعود اظہر کی طبیعت کی خرابی سے متعلق مزید کچھ نہیں کہنا چاہتا۔بھارتی میڈیا نے انٹیلی جنس ذرائع کی بنیاد پر یہ دعویٰ کیا تھا کہ مسعود اظہر جگر کے کینسر کے مرض کے باعث راولپنڈی کے ملٹری ہسپتال میں زیر علاج تھے۔انہوں نے دعویٰ کیا کہ جیش محمدکے سربراہ 2 مارچ کو دوران علاج انتقال کرگئے۔جیش محمد کے سربراہ کے قریبی ذرائع نے کہا کہ بھارتی میڈیا کی خبر کی تردیدمسعود اظہرکے اہلخانہ نے کردی ہے۔
