سیؤل(این این آئی)جنوبی کوریائی وزیر خارجہ نے کہاہے کہ شمالی کوریا کو جوہری پروگرام ختم کرنے کے وعدے دینے ہوں گے،امید ہے کہ شمالی کوریائی حکومت جوہری پروگرام کو ختم کرنے پر رضامند ہو جائے گی لیکن اس پر عمل بتدریج ہو گا۔ غیرملکی خبررساں ادارے کے مطابق جنوبی کوریا کی وزیر خارجہ کانگ کیونگ وا نے ورلڈ اکنامک فورم کے موقع پر گفتگو کرتے ہوئے کہا کہ شمالی کوریا کو اپنے جوہری پروگرام سے مکمل

دستبرداری کے لیے مناسب وعدے دینے ہوں گے۔ انہوں نے اس امید کا اظہار کیا کہ شمالی کوریائی حکومت جوہری پروگرام کو ختم کرنے پر رضامند ہو جائے گی لیکن اس پر عمل بتدریج ہو گا۔ کانگ کیونگ وا کا یہ بھی کہنا تھا کہ اس وقت جزیرہ نما کوریا کے لیڈروں میں مضبوط سیاسی کمٹ منٹ پائی جاتی ہے اور یہ یقینی طور پر مثبت نتائج کی حامل ہو گی۔ یہ امر اہم ہے کہ شمالی کوریائی اور امریکی لیڈروں کی دوسری ملاقات اگلے ماہ کے آخر میں ممکن ہے۔

موضوعات:کانگ کیونگ وا