برسلز(این این آئی)مغربی ممالک کے انٹیلی جنس اداروں نے بتایا ہے کہ ایران نے اپنے میزائل تجربات میں دوگنا اضافہ کردیا ہے۔ایران کی جانب سے متنازع میزائل تجربات اقوام متحدہ کی قرارداد 2231 کی کھلی خلاف ورزی ہیں۔غیرملکی خبررساں ادارے کے مطابق جرمن انٹیلی جنس ادارے نے بتایاکہ رواں سال کے دوران ایران نے درمیانے فاصلے تک مار کرنے والے میزائلوں کے 7، کم فاصلے تک مار کرنے والے5 اور کروز میزائلوں کے متعدد تجربات کیے۔ گذشتہ برس کی نسبت یہ میزائل

تجربات دو گنا زیادہ ہیں۔ذرائع کا کہنا تھا کہ ایران نے بعض ایسے میزائل تجربات بھی کیے ہیں جن کی رینج میں یورپی ممالک بھی آسکتے ہیں۔خیال رہے کہ ایران کے میزائلوں کے حوالے سے یہ رپورٹ ایک ایسے وقت میں سامنے آئی ہے جب گذشتہ منگل کو سلامتی کونسل کا ایک بند کمرہ اجلاس ہوا تھا جس میں امریکا نے ایران کیایک نئے میزائل تجربے کا انکشاف کیا تھا۔امریکا، فرانس اور برطانیہ نے ایران کے اس میزائل تجربے کو ایران کے میزائل پروگرام پر پابندیوں کی ناکامی قرار دیا تھا۔