تہران(انٹرنیشنل ڈیسک )ایشیائی پارلیمانی کانفرنس کے موقع پر قطری پارلیمنٹ کے اسپیکر اور ان کے ایرانی ہم منصب نے تفصیلی ملاقات کی ہے ۔ دونوں رہ نماؤں نے گرم جوشی کے ساتھ ایک دوسرے کا استقبال کیا اور دونوں طرف سے ایک دوسرے کی خوب تحسین اور مدح سرائی کی گئی۔
ایرانی خبر رساں ایجنسی کے مطابق تہران میں منعقدہ تیسری ایشیائی پارلیمانی کانفرنس میں قطرکی مجلس شوریٰ کے چیئرمین احمد بن عبداللہ ال محمود اور ان کے ایرانی ہم منصب علی لاری جانی نے ملاقات کی۔ اس موقع پر علی لاری جانی نے قطری اسپیکر پارلیمنٹ کو مخاطب کرتے ہوئے کہا کہ آپ بہت ذہین اور دانا انسان ہیں۔ پورا خطہ آپ کی دانش مندی کا معترف ہے۔ ایران میں آپ کو بے پناہ عزت واحترام کیساتھ دیکھا جاتا ہے۔ایرانی اسپیکر نے خطے میں قطر کے کردار کی تعریف کی اور کہا کہ دوحہ نے خطے مسائل کے حل کے لیے مثبت کردار ادا کیا ہے۔دہشت گردی کی معاونت پر چار عرب ممالک کی طرف سے قطر کے بائیکاٹ کے تناظر میں بات کرتے ہوئے ایرانی عہدیدار نے کہا کہ انہوں نے آپ کے ملک کے خلاف کئی انتقامی اقدامات کیے مگر ان اقدامات کا قطر کو کوئی نقصان نہیں پہنچا۔ وہ اس لیے کہ آپ نے اسے حکمت کے ساتھ نمٹایا۔ ان کا کہنا تھا کہ دنیا میں اقوام بیدار ہیں۔ ہرایک آزاد زندگی گذرانا چاہتا ہے۔ دنیا میں اجارہ داری کو کوئی قبول نہیں کرتا۔
