کابل(آئی این پی)افغان حکام نے کہا ہے کہ جرمنی نے ایک اور افغان باشندوں کے گروپ کو ملک بدری کے احکامات جاری کر دئیے ہیں، ملک بدر کئے جانے والا گروپ بدھ کو افغانستان پہنچے گا، دوسری جانب ناقدین کا کہنا ہے کہ افغانستان میں سلامتی کی بگڑتی ہوئی صورت حال مین مہاجرین کی زندگیوں کو خطرات لاحق ہیں۔ بین الاقوامی میڈیا کے مطابق افغان حکام کے مطابق جرمنی افغان مہاجرین کے ایک اور گروپ کو ان کے آبائی ملک افغانستان واپس بھیج رہا ہے۔

افغانستان میں سلامتی کی بگڑتی ہوئی صورت حال پر ناقدین کو ان مہاجرین کی زندگیوں کے حوالے سے خدشات ہیں۔بعض افغان حکام نے نام ظاہر نہ کرنے کی شرط پر جرمن خبر رساں ادارے کو بتایا ہے کہ جرمنی بدر کیے جانے والے افغان مہاجرین کا اگلا گروپ بدھ کے روز دارالحکومت کابل پہنچے گا۔باویرین ریفیوجی کونسل کے مطابق ان پناہ گزینوں کو لے کر ایک فلائٹ منگل کے روز میونخ ایئر پورٹ سے کابل کے لیے پرواز کرے گی۔مسترد شدہ پناہ کی درخواستوں کے حامل پناہ گزینوں کو افغانستان واپس بھیجنے کا یہ عمل 2016 دسمبر میں شروع کیا گیا تھا جس کے بعد سے اب تک 366 افغان تارکین وطن کو جرمنی بدر کیا جا چکا ہے۔طالبان کی جانب سے افغانستان بھر میں شدید ہوتے حملوں کے باعث یہ ملک بدریاں متنازعہ بنی ہوئی ہیں۔ اس سے قبل گزشتہ ماہ کی بارہ تاریخ کو سترہ افغان مہاجرین کا ایک گروپ جرمنی سے کابل پہنچا تھا۔جرمنی سے پناہ گزینوں کو واپس بھیجے جانے کے معاملے پر اس عمل کے مخالفین سخت تنقید کرتے ہیں کیونکہ ان کی رائے میں افغانستان جہادی گروپ اسلامک اسٹیٹ اور طالبان کی جانب سے مسلسل کیے جانے والے حملوں کی زد میں ہے اور اس حوالے سے اب بھی ایک خطرناک ملک ہے۔اس تناظر میں گزشتہ کچھ عرصے میں افغان مہاجرین اور مہاجرین کے حقوق کی تنظیموں کی جانب سے جرمنی میں احتجاجی مظاہرے بھی کیے جاتے رہے ہیں۔ ان مظاہرین کا موقف ہے کہ افغانستان محفوظ علاقہ نہیں ہے لہذا وہاں مہاجرین کو واپس بھیجنا درست فیصلہ نہیں۔