قاہرہ(این این آئی) دریا میں گرنے والی کم سن بچی کو بچا نے کے بعد خاندان کے تین افراد دریائے نیل کی نذر ہو گئے ۔ میڈیارپورٹس کے مطابق بچی اپنے گھر والوں کے ساتھ تفریح کیلئے دریاکے کنارے بیٹھی تھی کہ اچانک اسکا پائوں پھسلا اور دریا میں جاگری ۔بچی کو گرتے دیکھ کر وہاں بیٹھا ہوا 40 سالہ اسکول ٹیچر فورا بچی کو بچانے کیلئے دریا میں کود گیا ۔محمد عبدالموجود نامی اسکول ٹیچر نے بچی کو دریاکی موجوں سے نکال کر

بحفاظت کنارے پر موجود اسکے والدین کے حوالے کیا اسی دوران اسکا پائوں پھسل گیا ۔ عبدالموجود نیل کی تیز لہروں پر قابونہ رکھ سکا اسے ڈوبتا دیکھ کر اسکا 16 سالہ بیٹا اپنے والد کو بچانے کے لئے دریا میں کودا مگر وہ اس تک نہ پہنچ سکا ۔ شوہر اور بیٹے کو نیل کی لہروں سے لڑتے دیکھ کر فائزہ صبحی نے بھی دریا میں چھلانگ لگا دی ۔ بعدازاں انکی نعشیں دریاسے برآمد ہوئیں ۔ اہل علاقے نے اس المناک واقعے پر اپنے رنج و الم کا اظہار کرتے ہوئے اس خاندان کی شجاعت کو سراہا ۔