نئی دہلی(آئی این پی)بھارتی حکومت بھارت کی نصف آبادی کو صحت کی انشورنس فراہم کرے گی، انشورنس کے لئے ایک ارب 50کروڑ ڈالر مختص کر دئیے، 10کروڑ خاندان مستفید ہوں گے۔ بھارتی میڈیا کے مطابق بھارت نے اپنے ملک کی نصف آبادی کو صحت کی انشورنس فراہم کرنے کے لیے ایک ارب 50 کروڑ ڈالر سے زیادہ فنڈز مختص کیے ہیں جس سے تقریباً 10 کروڑ خاندانوں کو فائدہ پہنچے گا۔
بھارت نے اپنے ملک کی نصف آبادی کو صحت کی انشورنس فراہم کرنے کے لیے ایک ارب 50 کروڑ ڈالر سے زیادہ فنڈز مختص کیے ہیں جس سے تقریباً 10 کروڑ خاندانوں کو جن کی تعداد 50 کروڑ نفوس کے لگ بھگ ہے پیچیدہ بیماریوں کے علاج کے لیے سالانہ 5 لاکھ روپے تک کی سہولت حاصل ہو جائے گی۔نئے وفاقی بجٹ میں حکومت نے اپنیصحت پروگرام کے لیے 200 ارب روپے رکھے ہیں تاہم عہدے داروں کا کہنا ہے کہ جیسے جیسے یہ پروگرام آگے بڑھے گا اس کے لیے مزید رقوم مہیا کی جائیں گی۔بھارت کے وزیر صحت جے پی ندا نے کہا ہے یہ ایک اہم فیصلے کی جانب تاریخی قدم ہے اور یہ دنیا بھر میں صحت کے تحفظ کا سب سے بڑا پروگرام ہے۔بیمہ صحت کا یہ پروگرام جس سے بھارت کے غریبوں کو فائدہ پہنچے گا ایک ایسے ملک میں ، جہاں ڈاکٹروں اور اسپتالوں کی کمی ہے وزیراعظم مودی کے اصلاحاتی پروگرام کا ایک حصہ ہے۔بھارتی حکومت نے حالیہ سالوں میں دواؤں اور طبی آلات کی قیمتوں میں اضافے پر پابندیاں لگائی ہیں تاکہ صحت کی دیکھ بھال کے اخراجات عام لوگوں کی دسترس میں رہ سکیں۔بیمہ صحت پر اٹھنے والے اخراجات بھارت کی کل قومی آمدنی کے ایک فی صد کے مساوی ہیں، جو دنیا بھر میں صحت کے شعبے کے لیے رکھے جانے والے کم تر فنڈز میں شامل ہیں۔
