دبئی (مانیٹرنگ ڈیسک) پوری دنیا میں منی لانڈرنگ کے خلاف اقدامات کیے جا رہے ہیں اور انہی عالمی اقدامات کی وجہ سے پاکستانیوں کے دبئی میں جائیداد خریدنے کے رجحان میں کمی آئی ہے۔ ایک نجی ٹی وی چینل کی رپورٹ کے مطابق 2015ء کے مقابلے میں گزشتہ مالی سال دبئی رئیل سٹیٹ سیکٹر میں سرمایہ کاری کا حجم 50 فیصد کم ہو گیا ہے۔ رپورٹ کے مطابق پاکستانیوں نے 2017ء میں دبئی کے رئیل سٹیٹ سیکٹر میں ایک ارب 36 کروڑ ڈالر کی سرمایا کاری
کی اور یہ حجم 2015ء کے مقابلے 50 فیصد کم رہا۔ اس حوالے سے ماہرین کا کہنا ہے کہ پاکستانیوں کا شمار بھی سب سے زیادہ جائیدادیں خریدنے والوں کی فہرست میں ہوتا ہے۔ موجودہ حکومت کی طرف سے غیر ملکی اثاثوں کو ظاہر کرنے کے لیے حکومت کی جانب سے ایک ایمنسٹی سکیم متعارف کرائے جانے کی توقع ہے اور یہ سکیم متعارف کرانے کا مقصد پاکستانیوں کے غیر ملکی اثاثوں کو دستاویز کرنے کے ساتھ ساتھ ٹیکس کے دائرہ کار کو بڑھانا بھی شامل ہے۔
