ریاض(آئی این پی)سعودی عرب میں جنرل ڈائریکٹریٹ آف پبلک سکیورٹی نے 7 صوبوں میں خواتین کیلئے سپاہی کے منصب کی عسکری اسامیوں کا اعلان کردیا۔سعودی میڈیا کے مطابق یہ سات صوبے ریاض، مکہ مکرمہ ، مدینہ منورہ، قصیم، عسیر، باحہ اور شرقیہ ہیں۔درخواست دینے والی خواتین کے لیے شرائط میں خاتون کا سعودی ہونا، مملکت میں پرورش پانا، والد کے ساتھ سرکاری ملازمت میں بیرون ملک رہنے والی خواتین اس سے مستثنی ہیں ۔

کم از کم تعلیم انٹرمیڈیٹ ہونا اور عمر کا 25 سے 35 برس تک ہونا لازم ہے۔امیدوار کو تحریر امتحان ، انٹرویو اور میڈیکل ٹیسٹ میں کامیاب ہونا ضروری ہے۔ امیدوار کا اچھے چال چلن کا حامل ہونا بھی ضروری ہے۔ امیدوار نے پہلے کسی کوئی سرکاری ملازمت نہ کی ہو اور نہ کوئی عسکری خدمت انجام دی ہو۔ امیدوار خاتون کی کسی غیر ملکی سے شادی نہ ہوئی ہو اور خاتون خود مختار قومی شناخت کی حامل ہو۔خاتون کے ولی کی موجودگی اور خاتون کی ملازمت والے صوبے میں موجودگی دونوں ضروری ہیں۔ امیدوار کا قد 155 سینٹی میٹر سے کم نہ ہو اور وہ مناسب وزن رکھتی ہو۔