برسلز(آن لائن) بیلجیم کی ایک اعلیٰ عدالت نے سماجی میل جول کی ویب سائٹ فیس بک کو شہریوں کے کوائف جمع کرنے سے روک دیا۔غیر ملکی میڈیا رپورٹ کے مطابق ہفتہ کو بیلجیم کی ایک عدالت عظمیٰ میں سوشل میڈیا اکاؤنٹس سے متعلق سماعت ہوئی،دوران سماعت فاضل ججز نے سماجی میل جول کی ویب سائٹ فیس بک کو عام شہریوں کے ذاتی کوائف جمع کرنے سے ممنوع کر دیا ۔
عدالتی ریمارکس میں کہا گیا کہ اگر کوائف جمع کرنے کا سلسلہ روکا نہ گیا تو فیس بک انتظامیہ کو جرمانے کا سامنا کرنا پڑے گا۔ عدالت نے پرائیویسی کمیشن کے فیصلے کو بحال رکھتے ہوئے واضح کیا کہ کوائف صرف شہریوں کی رضامندی سے ہی جمع کئے جا سکتے ہیں۔واضح رہے کہ عدالت کے فیصلے پر تاخیر سے عمل کرنے کی صورت میں روزانہ کی بنیاد پر فیس بک کو تین لاکھ ڈالر سے زائد کا جرمانہ عائد کیا جا سکتا ہے۔
