واشنگٹن(این این آئی)افغانستا ن کے صدر اشرف غنی نے پاکستانی علماء کی طرف سے خود کْش حملوں کو مذہبی طور پر حرام قرار دینے سے متعلق فتوے کو ہدف تنقید بنایا ہے۔غیرملکی خبررساں ادارے کے مطابق افغان دارالحکومت کابل میں ایک ریلی سے خطاب کرتے ہوئے اشرف غنی نے سوال کیا کہ دہشت گردی کے خلاف فتوے کو پاکستان
تک محدود کیسے رکھا جا سکتا ہے۔ اْنہوں نے کہاکہ کیا اسلامی اصول دنیا کے تمام اسلامی ممالک پر نافذ نہیں ہوتے؟ کیا اْنہیں صرف ایک ملک تک محدود رکھا جا سکتا ہے؟اْنہوں نے روسی لیڈر سٹالن کا حوالہ دیتے ہوئے کہا کہ سٹالن کے اشتراکی نظریے کی طرح اسلامی تعلیمات کو کسی ایک ملک تک محدود نہیں کیا جا سکتا کیونکہ یہ آفاقی ہیں۔اْنہوں نے افغانستان میں طویل عرصے سے جاری عدم استحکام کیلئے پاکستان پر الزام کو دہراتے ہوئے کہا کہ پاکستان افغان طالبان اور اْس کی عسکری تنظیم حقانی نیٹ ورک کی پشت پناہی کرتا ہے۔ لہذا اس فتوے پر عملدرآمد افغانستان کے حوالے سے کیا جانا چاہئیے۔اشرف غنی نے کہا کہ افغان طالبان جیسے گروپوں کی حمایت کر کے پاکستان اپنے ہمسایہ اسلامی ملک کو غیر مستحکم کر رہا ہے۔ اْنہوں نے کہا کہ دہشت گردی کی حمایت کرنا سانپ پالنے کے مترادف ہے اور جو لوگ سانپ پالتے ہیں وہ ایک روز اْنہی کو ڈس لیتے ہیں۔
