بیجنگ(آئی این پی) چین نے کہاہے کہ پاکستان اور بھارت اپنے اختلافات کو بذریعہ مذاکرات ومشاورت حل کریں، چین کو کنٹرول لائن کے حالیہ کشیدہ حالات پر تشویش ہے، دونوں ممالک خطے میں امن واستحکام کے لیے اپنا کردار نبھائیں ، چینی وزارت خارجہ کی ترجمان ہواچھن اینگ نے اپنی معمول کی پریس بریفنگ میں کہا ہے کہ پاکستان اور بھار ت اچھے پڑوسی ممالک کا رویہ اپنائیں،
پاکستان اور بھارت اپنے تمام اختلاف وتحفظات کو مذاکرات اور مشاورت کے ذریعے حل کریں انہوں نے گزشتہ چند روز سے جاری کنٹرول لائن پر پاک بھارت کراس فائرنگ پر کئے گئے سوال کا جواب دیتے ہوئے کہا کہ چین کو پاک بھارت مابین کنٹرول لائن کی حالیہ واقعات وحالات پر تشویش ہے،دونوں ممالک کو خطے میں امن واستحکام کے لیے اپنا کردار بخوبی نبھانا ہوگا، لیکن اس کے لیے ضروری ہے، کہ دونوں ممالک آپس میں امن امان کے قیام کے لیے ٹھوس منصوبہ اپناتے ہوئے اس پر عمل کریں، چین دونوں ممالک کاہمسائیہ ہے، اس سے چین کو دونوں ممالک کے حالات پر تشویش لاحق ہے، ہوا چھن اینگ نے کہا ہے کہ اسے حالات میں کوئی بھی ملک ترقی وا تعمیری مراحل طے نہیں کرسکتا ، جب تک وہاں امن قائم نہ ہو،اگر دونوں ممالک اسی رویے کا شکار رہے تو وہ خطے میں امن وامان کیلئے اور دہشتگردی سے لڑنے میں کیسے کامیاب ہوسکتے ہیں۔
