اسلام آباد (آئی این پی)بھارت میں سابق پاکستانی ہائی کمشنر عبدالباسط نے امریکہ میں تعینات پاکستانی سفیر اعزاز چوہدری کو بدترین سفارت کار قرار دیتے ہوئے ان کو عہدے سے ہٹائے جانے کا مطالبہ کردیا۔ یہ مطالبہ عبدالباسط کی جانب سے بطور بھارت میں پاکستانی ہائی کمشنر، نئی دہلی سے 5جولائی 2017کو امریکہ میں
تعینات پاکستانی سفیر اعزازاحمد چوہدری اور ڈائریکٹر ایف ایس او وزارت خارجہ کو لکھے گئے خط کے منظر عام پر آنے کے بعد سامنے آیا جس میں انہوں نے ڈائریکٹر ایف ایس او ‘ وزارت خارجہ کے 12مارچ ‘ نمبر ایف ایس او 1/2017 کا حوالہ دیتے ہوئے کہا کہ جہاں تک میں نے اندازہ لگایا ہے اور میرا خیال ہے اعزاز چوہدری ہمیشہ بدترین سیکرٹری خارجہ رہے ہیں۔ میرے تحفظات یہ بھی ہیں کہ وہ اپنی واشنگٹن ڈی سی میں بطور سفیر مدت بھی بدترین طریقے سے پوری کریں گے اس کی وجوہات بڑی سادہ ہیں۔ ایک تو یہ ہے کہ آپ سفارتکاری کے شائستہ پیشے کے لئے بنے ہی نہیں اور اس حوالے سے میں کئی مثالیں پیش کرسکتا ہوں ان میں اوفا مشترکہ اعلامیہ اور پاکستان کی انسانی حقوق کونسل میں بری شکست میرے نکات کو ثابت کرنے کے لئے کافی ہیں۔ دوسری اور انتہائی پریشان کن بات یہ ہے کہ آپ کا دل و دماغ صحیح جگہ پر نہیں ہے۔ عبدالباسط نے اپنے خط میں لکھا ہے کہ میں یہ بات بڑی شدت سے محسوس کرتا ہوں کہ یہ پاکستان کے مفاد میں ہے کہ آپ کو فوری طور پر واشنگٹن ڈی سی میں بطور سفیر عہدے سے ہٹایا جانا چاہئے اور اگر ایسا نہیں ہوسکتا تو آپ کو آپ کی مقررہ مدت 27فروری 2018 سے آگے ہرگز توسیع نہیں دی جانی چاہئے۔ اﷲ تعالیٰ پاکستان کی مدد کرے۔ ایسی اہم پوسٹوں پر رہنے کے باوجود لوگ آپ کو آپ کی کمزوریوں سے یاد کریں گے۔
