نئی دہلی(این این آئی)بھارت کے مختلف علاقوں میں مون سون کی بارشوں سے آنے والے سیلابوں کی زد میں آ کر ہلاک ہونے والوں کی تعداد 100پہنچ گئی ہے۔ بھارتی میڈیا کے مطابق بھارتی ریاست گجرات میں ہونے والی موسلا دھار بارش کی لپیٹ میں آ کر گیارہ انسانی جانیں ضائع ہوئی تھیں۔ بھارت کی شمال مشرقی ریاستیں اروناچل پردیش اور

آسام خاص طور پر سیلاب سے شدید متاثر ہیں۔ صرف آسام میں ہونے والے ہلاکتوں کی تعداد ساٹھ ہو چکی ہے اور ریاستی حکومت نے پوری ریاست میں ایمرجنسی کا نفاذ کر دیا ہے۔ ہزاروں لوگوں کو سیلاب سے متاثرہ علاقوں سے محفوظ مقامات پر منتقل کیا جا چکا ہے۔ بھارت کے پانچ بڑے دریاؤں میں پانی کی سطح خطرناک حد تک بلند ہے۔