اسلام آباد(مانیٹرنگ ڈیسک)بھارتی وزیراعظم نریندر مودی گزشتہ روز اسرائیل کے تین روزہ دورے پر تل ابیب پہنچ چکے ہیں جہاں بن گورئین ائیرپورٹ پر ان کانہایت شاندار استقبال کیا ، ان کے استقبال انداز ایسا تھا جو اس سے پہلے صرف امریکی صدور کے لئے مخصوص رکھا گیا تھا۔ واضح رہے کہ عالمی سیاسی و دفاعی مبصرین پہلے ہی اس دورے کو غیرمعمولی قرار دے رہے ہیں

کیونکہ بھارت کی 70 سالہ تاریخ میں نریندر مودی وہ پہلے وزیراعظم ہیں جو اسرائیل کا دورہ کررہے ہیں۔مختلف ذرائع سے حاصل ہونے والی خبروں کے مطابق بھارت اور اسرائیل کے درمیان ایک ارب ڈالر کے دفاعی معاہدوں پر دستخط کئے جائیں گے ۔ مودی کے دورہ اسرائیل پر پاکستان نے سرکاری طور پر تو کوئی تبصرہ نہیں جاری کیا تاہم پاکستانی دفاعی تجزیہ نگار اس دورہ کو پاکستان کیلئے تشویش کی نگاہ سے دیکھ رہے ہیں کیونکہ یہ دورہ پاکستان کےلیے بالخصوص خطرناک صورتِ حال کا پیش خیمہ ثابت ہوسکتا ہے۔پاکستان کے موقر انگریزی اخبارایکسپریس ٹربیون کی ایک رپورٹ کے مطابق دفاعی تجزیہ نگار لیفٹیننٹ جنرل (ر) امجد شعیب کا کہنا ہے کہ بھارت اس دورے کے ذریعے اسرائیل کو استعمال کرتے ہوئے جدید ترین امریکی دفاعی ٹیکنالوجی حاصل کرنے کی کوشش کرے گا جنرل شعیب کا مؤقف تھا کہ اگر بھارت اپنے مفاد کی خاطر بیک وقت اسرائیل اور ایران کے ساتھ تعلقات استوار کرسکتا ہے جبکہ دونوں ہی ایک دوسرے کے بدترین دشمن ہیں، تو پاکستان کو بھی اپنے قومی مفادات سامنے رکھتے ہوئے اپنی خارجہ پالیسی پر نظرِثانی کرنی چاہیے اور گنتی کے چند ملکوں کو خوش رکھنے والی سوچ سے باہر آنا چاہیے۔ڈاکٹر ظفر نواز جسپال نے خدشہ ظاہر کیا کہ بھارت اور اسرائیل میں بڑھتے ہوئے

عسکری تعلقات جنوبی ایشیا میں طاقت کا توازن بگاڑ سکتے ہیں کیونکہ بھارت اپنے میزائل پروگرام کو تیز رفتاری سے آگے بڑھانے کےلیے اسرائیل سے ضرور مدد حاصل کرے گا جس سے دفاعی استعداد کو ایک خاص سطح تک رکھنے کی پاکستانی پالیسی شدید طور پر متاثر ہوگی۔ یاد رہے کہ اسرائیلی حکام نے نریندر مودی کے دورہ اسرائیل میں ایجنڈے کے مرکزی نکات میں

دہشت گردی اور عسکری امور شامل نہ ہونے کا بیان جاری کیا ہے تاہم عالمی تجزیہ نگاروں کا خیال ہے کہ اس دورے میں بھارت اور اسرائیل کے مابین یقینی طور پر کچھ نہ کچھ خفیہ معاہدے ضرور طے پائیں گے جو بیان کردہ ایجنڈے سے بالکل ہٹ کر بھی ہوسکتے ہیں۔