اسلام آباد(مانیٹرنگ ڈیسک)بھارت کی جانب سے پاکستان کو مذاکرات کی مشروط پیش کش، مقبوضہ کشمیر میں جاری کشمیریوں کی آزادی کی مسلح تحریک کو پاکستان سے جوڑنے کی ایک اور کوشش۔ تفصیلات کے مطابق بھارتی وزیر خارجہ سشما سوراج نے پاکستان اور
بھارت کے درمیان مسئلہ کشمیر پر گفتگو کرتے ہوئے اس تاثر کو یکسر مسترد کر دیا ہے کہ بھارت کی جانب سے کلبھوشن کے معاملے کو عالمی عدالت انصاف میں لے جانے کے بعد اب پاکستان مسئلہ کشمیر کو عالمی عدالت انصاف میں لے جائے گا۔ بھارتی وزیر خارجہ کا کہنا تھا کہ پاکستان اور بھارت کے درمیان ہونیوالے شملہ معاہدہ اور لاہور ڈکلریشن میں یہ واضح طور پر لکھا ہے کہ دونوں ممالک باہمی مذاکرات سے مسئلہ کشمیر کا حل نکالیں گے اور اس سلسلے میں دونوں ممالک بغیر کسی تیسرے کی مداخلت کے مسئلہ حل کریں گے۔سشما سوراج کا کہنا تھا کہ دونوں ممالک باہمی معاہدات کو پورا کرنے کے پابند ہیں۔ بھارتی وزیر خارجہ کا کہنا تھا کہ بھارت پاکستان سے مذاکرات کا خواہاں ہے تاہم بات چیت اور دہشتگردی ساتھ ساتھ نہیں چل سکتی ۔
